Arbeiðsloysið millum limirnar í Søfartens Ledere er nú fyri fyrstu ferð í meira enn 10 ár omanfyri fimm prosent. Roknað verður við, at hækkingin, sum er ein avleiðing av lágu farmagjøldunum og kreppuni í oljuvinnuni, heldur fram við at vaksa komandi mánaðirnar.

”Høga arbeiðsloysið kemst serliga av lágu farmagjøldunum, ið leggja bingju- og turrfarmavinnuna undir trýst, og lága oljuprísinum, sum hevur rakt frálandsvinnuna sera meint, eisini í Norra”, sigur Peter Friis Jespersen, ráðgevi í Søfartens Ledere. 

Heilt nágreiniliga vóru 5,06 prosent av limunum, ið samstundis eru tryggjaðir umvegis Min A-kasse, arbeiðsleysir um mánaðarskiftið januar/februar 2017. Peter Friis Jespersen væntar, at arbeiðsloysið heldur fram við at vaksa komandi tíðina.

”Tá vit koma inn í apríl, fara fleiri av uppsøgdu limunum í td. Maersk Supply Service at koma undan kavi í arbeiðsloysishagtølunum, tí uppsagnartíðir teirra ganga út tá. Vit gera alt, sum vit kunnu fyri at hjálpa teimum, men tíverri fáa ikki allir møguleika at halda fram í nýggjum størvum”, sigur Peter Friis Jespersen.

Í desember var arbeiðsloysið 3,5 pst. Somu tíð í 2015 var talið 1,8 pst., sambært fakfeløgunum.

Kelda: Søfartens Ledere/maritimedanmark.dk